महिनादिनमै सुदूरपश्चिम प्रदेश सरकार ढलेसँगै नेपाली कांग्रेसका संसदीय दलका नेता कमलबहादुर शाह मुख्यमन्त्रीमा नियुक्त भएका छन् ।
गत पुस २७ मा नेकपा एमालेका राजेन्द्रसिंह रावल मुख्यमन्त्रीमा नियुक्त भएका थिए । उनलाई माओवादी, एमालेसहित तीन दलको समर्थन थियो । रावलले आफू नियुक्त भएको महिना दिनभित्र प्रदेशसभामा विश्वासको मत दिन सकेका थिएनन् । उनले विश्वासको मत प्राप्त गर्न नसकेसँगै नेपाली कांग्रेसले ठूलो दलको हैसियतमा सरकारको नेतृत्व गर्ने अवसर पाएको हो । सुदूरपश्चिममा १९ सिट रहेको कांग्रेस सबैभन्दा ठूलो दल हो ।
नागरिक उन्मुक्ति पार्टीले विश्वासको मत नदिएपछि मुख्यमन्त्री रावल एक महिनामै बिदा भए । संविधानको धारा १६८ (२) अनुसार सरकारले विश्वासको मत प्राप्त गर्न नसकेपछि प्रदेशको ठूलो दल नेपाली कांग्रेसको संसदीय दलको नेता कमलबहादुर शाहलाई प्रदेश प्रमुखले मुख्यमन्त्री नियुक्त गरेका हुन् । शाहको शपथग्रहण भने भोलि (शुक्रबार) हुनेछ ।
शाहले पनि ३० दिनभित्र प्रदेशसभाबाट विश्वासको मत लिनुपर्नेछ । ५३ सदस्यीय सुदूरपश्चिममा कांग्रेसको १९, नेकपा एमालेका १०, माओवादी केन्द्रका ११, नागरिक उन्मुक्ति पार्टीका ७, नेकपा एकीकृत समाजवादीका ४, राप्रपा र स्वतन्त्र १/१ सांसद छन् ।
मंसिर ४ को निर्वाचन परिणामपछि संघदेखि प्रदेशसम्म सत्ताबाट बाहिरिएको कांग्रेसले सुदूरपश्चिमबाट सत्ता यात्रा थालेको छ ।
५३ सदस्यीय प्रदेशसभामा कांग्रेस १९, माओवादी केन्द्र १०, एमाले १०, नागरिक उन्मुक्ति पार्टी ७, एकीकृत समाजवादी ४, राप्रपा एक र एक जना स्वतन्त्र सांसद छन् ।
यसअघि पुस २७ गते माओवादी केन्द्र ११, एमाले १०, नागरिक उन्मुक्ति पार्टी ७, र एकजना राप्रपा सांसदको समर्थनमा एमाले संसदीय दलका नेता राजेन्द्रसिंह रावल मुख्यमन्त्री बनेका थिए ।
